एएफसी एसियन कप छनौटः माल्दिभ्स र बंगलादेश पराजित

काठमाडौं (एजेन्सी) । बुधबारदेखि शुरु एएफसी एसियन कप छनौटतर्फ दुई दक्षिण एसियाली राष्ट्र माल्दिभ्स र बंगलादेशले हारबाट छनौट प्रतियोगिताको शुरुवात गरेका छन् ।

समूह सी मा रहेको माल्दिभ्सले आफ्नो पहिलो खेलमा थाइल्याण्डसँग ३–० ले पराजित भएको हो । उज्वेकिस्तानमा भईरहेको समूह सी तर्फ माल्दिभ्सले आफ्नो दोस्रो खेल शनिबार आयोजक उज्वेकिस्तानसँग खेल्नेछ । त्यस्तै समूह सी मै रहेको अर्को दक्षिण एसियाली राष्ट्र श्रीलंकाले बुधबार नै उज्वेकिस्तानसँग खेल्ने कार्यक्रम पनि छ ।

त्यस्तै समूह ई मा रहेको बंगलादेशले आफ्नो पहिलो खेलमा बहराईनसँग २–० को हार बेहोरेको छ । बंगलादेश समूह ई को आयोजक राष्ट्र समेत हो । समूह ई मा बहराईन र बंगलादेश बाहेक तुर्कमेनिस्तान र मलेसिया पनि रहेका छन् । बंगलादेशले आफ्नो आगामी खेल शनिबार तुर्कमेनिस्तानसँग खेल्नेछ ।

त्यस्तै समूह डी मा रहेको अफगानिस्तानले हङकङसँग २–१ को हार बेहोरेको छ । सो समूहमा यी दुई टोली बाहेक आयोजक भारत र कम्बोडिया रहेका छन् । भारतले बुधबार नै हुने अर्को खेलमा कम्बोडियासँग खेल्ने कार्यक्रम छ ।

नेपालले जोर्डनसँग खेल्दै

एएफसी एसियन कप छनौटतर्फ समूह ए मा रहेको नेपालले भने बुधबार अबेर राती १ बजे बलियो जोर्डनसँग खेल्ने कार्यक्रम छ । समूह ए मा नेपाल र जोर्डनसँगै आयोजक कुवेत र इण्डोनेसिया रहेका छन् ।

 


प्रतिक्रिया दिनुहोस

Loading...