ओसाकालाई चौथो ग्राण्डस्लाम उपाधि

एजेन्सी । जापानकी नाओमी ओसाकाले करियरको चौथो ग्राण्डस्लामका रुपमा प्रतिष्ठित अष्ट्रेलियन ओपनतर्फ महिला एकलतर्फको उपाधि जित्न सफल भएकी छिन् । फाइनलमा ओसाकाले अमेरिकाकी जेनिफर ब्राडीलाई पराजित गर्दै आफूलाई टेनिस कोर्टमा फेरि एकपल्ट अब्बल साबित गरिन् ।

मेलबर्नमा सम्पन्न फाइनल भिडन्तमा ओसाकाले पहिलोपटक ग्राण्डस्लाम फाइनल खेलिरहेकी ब्राडीमाथि ६–४, ६–३ को सहज जित निकालिन् । ओसाकाले समग्रमा दोस्रोपटक अष्ट्रेलियन ओपनको उपाधि जित्न सफल भएकी हुन् । यसअघि उनले सन् २०१९ पहिलोपटक यो उपाधि जितेकी थिईन् ।

साथै ओसाकाको करियरको यो चौथो ग्राण्डस्लाम उपाधि समेत थियो । ओसाकाले अष्ट्रेलियन ओपन बाहेक प्रतिष्ठित युएस ओपन पनि सन् २०१८ र २०२० मा जित्न सफल भएकी थिईन् ।