ह्याण्डबलको बन्द प्रशिक्षण पोखरामा शुरु

सागका लागि ह्यान्डबलको बन्द प्रशिक्षणमा रहेका खेलाडी समूहिक तस्वीर खिचाउदै ।

पोखरा (खेलदैनिक) । नेपालमा आयोजना हुने १३ औं दक्षिण एशियाली खेलकुद (साग) अन्तरगत ह्याण्डबल खेलको बन्द प्रशिक्षण पोखरामा शुरु भएको छ । राष्ट्रिय खेलकुद परिषदका सदस्य राजेश गुरुङले प्रशिक्षकद्वय अरुणलाल कर्ण र टेकबहादुर विश्वकर्मालाई बल हस्तान्तरण गरि बन्द प्रशिक्षणको शुभारम्भ गरेका हुन् ।

सदस्य गुरुङले खेलाडीहरुलाई शुभकामना दिंदै राष्ट्रिय गौरब बढाउन ह्याण्डबल खेलले महत्वपूर्ण भूमिका निर्वाह गर्ने बताए । तोकिएकै मितीमा नेपालमा साग हुनेमा कुनै शंका नपाल्न सदस्य गुरुङले आग्रह गरे । उनले खेलाडी र प्रशिक्षकलाई भत्ता लगाएतका सुविधाहरु थप गर्न परिषदले गृहकार्य थालेको समेत जानकारी दिए ।

सागका लागि ह्यान्डबलको बन्द प्रशिक्षण शुभारम्भ गराउने क्रममा बल हस्तान्तरण गरिदै ।

कार्यक्रममा नेपाल ह्याण्डबल संघका अध्यक्ष तेज गुरुङले खेलाडीलाई आफ्नो अनुशासनमा रहि पदक जितेर राष्ट्रिय गौरव बढाउन ह्याण्डबल खेलाडीलाई आग्रह गरे ।

साग अन्तरगत बन्द प्रशिक्षणका लागि २८ महिला र २८ पुरुष गरि ५६ जना खेलाडीहरु पहिलो चरणको छनोटमा परेका छन । सागको महिला तथा पुरुषको ह्याण्डबल खेल पोखरा रंगशाला स्थित बहुउद्देश्यीय कभर्डहलमा हुनेछ ।


प्रतिक्रिया दिनुहोस

Loading...