म्याग्दीमा राष्ट्रियस्तरको ब्याडमिन्टन प्रतियोगिता हुने

म्याग्दी । म्याग्दी सदरमुकाम बेनीमा आगामी चैतमा राष्ट्रियस्तरको ब्याडमिन्टन प्रतियोगिता हुने भएको छ । म्याग्दीका युवाको नेतृत्वमा काठमाडौँमा स्थापित गंगटा युथ क्लबको आयोजनामा चैत १० देखि १२ गतेसम्म बेनीमा चौथो खुल्ला राष्ट्रिय ब्याडमिन्टन प्रतियोगिता हुन लागेको हो ।

राष्ट्रियस्तरका व्यावसायिक र विभागीय टोलीका खेलाडीसमेत सहभागी हुने प्रतियोगिताको तयारी तीव्र पारिएको क्लबले बेनीमा पत्रकार सम्मेलन गरी जानकारी गराएको छ ।

क्लब स्थापनासँगै काठमाडौँमा निरन्तर रुपमा आयोजना गर्दै आएको प्रतियोगितालाई यसपटक म्याग्दीमा आयोजना गरिएको क्लबका अध्यक्ष रमेश पुनले बताए । प्रतियोगितामा राष्ट्रियस्तरका पाँच र स्थानीय एक गरी ६ इभेन्टमा खेल खेलाइनेछ । बेनीस्थित कबर्डहलमा हुने प्रतियोगितामा देशभरका करिब ३०० खेलाडीले सहभागिता जनाउने अध्यक्ष पुनले जानकारी दिए ।

प्रतियोगिताअन्तर्गत मेन्स डबल इभेन्टमा विजयी हुनेलाई सर्वाधिक पुरस्कार राशि रु एक लाख नगदसहित ट्रफी, मेडल र प्रमाणपत्रद्वारा पुरस्कृत गरिनेछ । त्यस्तै द्वितीय र तृतीय हुनेलाई क्रमशः नगद रु ५० हजार र रु २५ हजार पुरस्कार प्रदान गरिने क्लबका उपाध्यक्ष योगेन्द्र गुरुङले बताए ।

प्रतियोगिताअन्तर्गत मेन्स सिङ्गल इभेन्टमा प्रथमलाई ६० हजार, द्वितीयलाई ३० हजार र तृतीयलाई पाँच हजार तथा उमेन्स सिङ्गल, भेटरान्स डबल र १७ वर्षमुनिका पुरुषको सिङ्गल इभेन्टमा प्रथमलाई ५० हजार, द्वितीयलाई २५ हजार र तृतीयलाई पाँच हजार नगदसहित ट्रफी, मेडल र प्रमाणपत्रद्वारा पुरस्कृत गरिनेछ ।

सहभागी हुने खेलाडीलाई खान र बस्नको व्यवस्था निःशुल्क गरिएको प्रतियोगितामा करिब १७ लाख खर्च हुने अनुमान गरिएको छ ।


प्रतिक्रिया दिनुहोस

Loading...